`S isch schun ä Weil hää, dass mo d‘letschd Singstund beim Männorchoor khat hewe. Die war im Mäz 2020.`S wa halt immo schee, des Singe un donn hinnenooch. Do hot`s schun ä paar gewwä mit eme gwaldische Sitzflaaisch. Vor allem die vum Runde Eckdisch. Monchmol wares finfe/sechse, monchmol aa ämol ugfär fuffzeene. Jez hot sich ona vun denne bsunne, was or do als gesse un gedrunkä hot. Zwaai bis drei saure roschdische Schorle, ab un zu, wonn`s luschdisch wa, a oons oddor zwaai mee. Un dezu als emol en Worschdweck odor ä heisses Werschdl un än Weck däzu. Des isch jez fuffzeh Monet hää un des sen jo ugfär amend fuffzisch Singstundä. Des hoddor sich donn ausgrächlt, was des ugfär alles zommä gekoschd heed. Alderle! Do kummt awor was zomme! Jez hoddor gedenkt: Wu isch donn des gonze Geld nokummä? Ha, des muss halt noch uff em Konto soi. Eigentlich khärt mir des jo ganed! Recht hoddor! Jez rod ämol, was or gmacht hot?Är hot des gonze Geld äm Voroi gschbend!
Un die Volksbonk Kerrloch hot aa noch so ä gudi Idee khat. Die hewwe gedenkt: Do mache mor aa mit un hewwe äm Liedorkronz a nochmol 500 € schbendieord! Do konnsch bloß donkschee sare!
Hallo Lait! Amend gibds noch ä paar, die so ä gudi Idee hewwe!? Be.